खुगाफोदनाय

भारताव राव सोलायनाया जारिमिन सोरजिनो हाबाय। गिबिसिन राव सोलायनाया जानो हागौ संस्कृत, प्राकृत, आरो पाली रावनि गेजेराव जानायनि अनगायैबो गुबुन-गुबुन जाखांफुनाय ओनसोलारि राव आरो आरबीक आरो पार्चीयान रावनि जेराव जादोंमोन। भारतारि गोजाम सल आरो गियाननि फरा बिजाब जेरै रामायन, महाभारत आरो भगवत गीताखौ 8थि आरो 13थि जौथायनि गेजेराव आरबीक रावाव राव सोलायनाय जादोंमोन। बे समावनो भारतारि आरो फरासी थुनलाइनि गियाननि गेजेराव सोलाय सोल जादोंमोन। संस्कृत, रावनि फरा बिजाब जरखायै भगवत गीता आरो उपनिषद्फोरा भक्ती मुगायावनो भारतारि रावफोरजों सोमोन्दो वाव फैनो हादोंमोन। बे सोमोन्दोनि थाखायनो गुबुन-गुबुन रावाव गियाननि फरा बिजब सोरजिनो हादोंमोन जेरै ज्ञानेश्वरी सासे माराती मुनि खन्थाइगिरिया ज्ञानेश्वरा गीताखौ रावसोलायनाय आरो गोबां सलन्थाइमानि उदां रावसोलायनाय , जरखायै गुबुन –गुबुन रावनि मुनि खन्थाइगिरिफोरा रामायन आरो महाभारतखौ राव सोलायनाय।बिदिन्थि महरै, पम्पा, कामबर, मौला, इजुथाचन, तुलसीदास, प्रेमानन्द , एकनाथ, बलरामदास , मादब कन्दली आरो कृत्तिवासमोननि रामायननि मखजाथाव रावसोलायनायखौ मखनो हायो।

ब्रिटिस फाममुवारि मुगायाव जरखायै संस्कृत, भारतारि रावफोर आरो इउरपियान रावफोरनि गेजेराव राव सोलायनाय नुनो मोनो। बै समाव भारतारि रावफोर आरो जार्मान, फ्रान्स, इटालियान, स्पैनिश , रावनि गेजेराव सिनायलायनो खाबु मोनदोंमोन . आरो इंराजी रावखौ खुंगिरिफोरनि मानगोनां राव महरै गनायनाय जायोमोन। ब्रिटिसफोरनि रावसोलायनाय मुगाफारिनि जोबथा बिन्दोवा उइलियाम जनसनि कालीदासनि अभिज्ञान शाकुंतलमखौ राव सोलायनायनि गेजेरजों मोनफैयो। शाकुंतलमा गांसे बिजाब महरै आथिखालाव भारतारि हारिमु सोदोमस्रिनि दिन्थि महर जाना फैबाय आरो भारतारि साग्रांथि लाबोहोग्रा बिजाबफोरनि मादाव गांसे।19थि जौथायाव बेयो माबोरै मोनजि रावनिबो बांसिन भारतारि रावाव दानस्लाय जानाय बेनो फोरमान। ब्रिटिसफोरनि राव सोलायनायाव आखाइ होनो नाजानाया गावसुफुंथायारि सानस्रि थांखि गोनां बिसोर गोदान खुंगिर्फोरखौ मिथिनो, बाहागो खालामनो आरो गावसोरनि सिङाव लाखिनो राव सोलायनो लादोंमोन।बिसोर गावसोरोनि आलादा भारत सोरजिना लादोंमोन ओरैहाय भारतारि रावसोलायगिरिफोरा इंराजीयाव राव सोलायनो थाखाय फेहेरनो , गेबें खालामानो , नायफामनो आरो माब्लाबा ब्रिटिसफोरनि साननाय हनायजों मोगा मोगिनो जानांदोंमोन। बे गासै दाहारा ,समरा ,समरि मुगानि बिजाबनि सोलाय गोजाम बिजाबनि बेलायाव जादोंमोन। राजा राममोहन रायनि संकरानि बेदान्तखौ रावसोलायनाय आरो केनानि इस्मास्या उपनिषदानो भारतारि बिजाबनि भारतारि पन्दितफोरा इंराजीयाव गिबि गिबियै इंराज दोरोंनि उदाङै रावसोलायनाय ।बिनि उनाव आर. सि.दत्तनि रावसोलायनाय रिगबेद उपनिषद, रामायन, महाभारत आरो माखासे क्लासिकेल संस्कृत थुनफावथायफोरखौ रावसोलायनाया रमान्टिक आरो गासैमुवा बेसादफोरा सुखुनि होनना फोथायग्रा भारतारि सानस्रि, गावखौ बावगोमाना थाग्रा, अलसिया आखुनि बेरेखायै दोहौ लाबोयो। बिनि उनाव दिनबन्धु मित्र, रबिन्द्र नाथ ठाकुरमोनखौ लाफानानै सानैसो रावसोलायगिरिफोरा राव सोलायनायनि दैबाना लाबोयो। एसेल ब्लालो बे सामाव भारतारि रावफोरनि गेजेरावनो राव सोलायनाया जागायजेननो हमो।

बबेखानि थारै बुंनो गोनांब्ला इंराजी रावा दासिम लेखा गोरों बांसिन भारतारिफोरनिबो गोरलैयै बुजिनो हानाय राव जानो हायाखै। बे थाखोनि सुबुंफोरखौ मिथिहोनो एबा बुजि मोनहोनो गोनांब्ला माखासे भारतारि रावफोरनि गेदेमा थुनलाइयारि आरो गियान थानाय बिजाब राव सोलाय नांगोन। बे बेलायाव गान्धीजीनि नोजोरा ओंथि गोनां- “आं सानो इराजी रावा हादरगेजेरारि बेपार- फालांगिनि राव आरो बेनिखायनो माखासे सुबुंफोरा बेखौ सोलोंनाया गोनां ... आरो इंराजी रावाव आखा-फाखा जानो आं बिसोरखौ थुलुंगा होनो मोजां मोनो, जायफोरनिफ्राय इंराजी रावनि गेदेमा बिजाबफोरखौ ओनसोलारि रावाव राव दान स्लायनो हास्थायो।“ बियो इंराजी रावखौ बिजों महरै आजावनायखौ भारतारि रावफोरनि जौगानायनि हेंथा होनना सानदोंमोन।

एल.एम. खूबचंदानीया फोरमायनाय बादिब्ला पाठशाला आरो मकतबफोरनिगेजेरजों सोलिनाय- आगु फामुवारि (ब्रिटिसनि आगु) भारतारि सोलोंनाय खान्थिया फरायसालिनि सोलोंथाय गुबै समाजारि गोसारहोनाय आरो रावबिगियानारि आरिमु आरजिनाय जायनि गेजेरजों साफ्रोमबो बुजिनो हानाय ओनसोलारि रावसानिफ्राय लानानै जौगा मानगोनां रावसिम जौगाहोनायाव मदद होनो होयो होनना गनायो। माखासे बाहायजानाय राव आरो हांखोफोरा रावबिगियानारि थासारिजों खाब जाहोनो हादों।भारतनि दोरोङारि रावनि गोबां रावारि आखुथायखौ सैनो हायै फामुवारि खुंगिरिफोरा इंराजी आरो भारतारि रावनि गेजेराव फाराग सोरजिना भारतारि सोलोंथायाव गावसुफुङारि सुस्रांनाय जथायो। मेकाउलिनि भारतनि सोलोंथायनि सायाव सुंद नोजोर (1835) आरो बिनि सिगांनि मावगिरिफोरनि हाबाया भारतारि रावफोरखौ नासयदोंमोन। उदांस्रिनि उन समाव बिमा रावखौ सोलोंथायनि बिजों महरै गोनांथि होनायनि इसादिखौ नुनो मोनो आरो माहारि गेजेरारि आफाद इउनेसकनि फोरमायथाय गोसोन्थियारि समाजारि आरो सोलोंथायारि फारसेनिफ्राय बिमा रावजों सोलोंथाय लानाय सासे गथवा मोजांसिनै आरो गोख्रैसिनै लानो हायो बे बाथ्राखौ गोबां राव बिथांखिगिरिफोरा दैखांनाय नुनो मोनो।

बेनिखायनो जोंनि माहारि आरो फरायसालि मोननैयावबो मोनसे आबहावा सोरजि नांगोन जेराव माहारिनि गुबुन-गुबुन रावफोरखौ मोननो हायो। बे हाबाया जाफुंनानै फैगोन जेब्ला जों फारायसा आरो फोरोंगिरिफोरनो थोजासे राव सोलायनाय थुनलाइयारि आरो गियान थानाय गुबै बिजाब होनो हायो ।बेखौ मखनो गोनांदि-जों एरैबादि बिजाबखौ राव सोलाय नांगोन मोनसे भारतारि रावनिफ्राय गुबुन भारतारि रावाव- गुवारै रावसोलायनाय राहाजों- बेनि सेलाय – जौगा होनना बुंजानाय सोनाबारि रावफोरनि गियान थानाय बिजाबफोरखौ (थोंजोड़ै) लाबोना रावसोलायनायनि हेंथायै (सिंह-1990)।

गाव गावनि बिमा रावनि गेजेरजों जौसिन गियान मोनहोनाय, सरासनस्रा भारतनि हौवा आरो हिनजाव साफ्रोमनोबो बे गियानखौ मोननांगेन बे जोंनि गोख्रों फोथायनाय। बे सरासनस्रा आवथानि सायाव बिथा खालामनानैनो हादरारि राव सोलायनाय मिसन (NTM) जोनोम लादों।