ৱারোইশিন

লৈবাক অমা ওইনা, ভারতনা মপূং ফারবা গনতন্ত্রগী ফিরেপ ফংদুনা শীংথানীংঙাই ওইবা থাক অমদা লৈরি৷ লৈবাক অসিনা ৱাখল খনবগী মনীং-মখা তম্বদু ঊতনবা হোতনদুনা, সমস্যাশিং মায়োক য়ানীংবগী অপাম্বা ঊত্তুনা অমসুং অপূনবা পনথুংফম অমগী মীতয়েং থম্লিবা তোঙান-তোঙানবা মীওইশিং পূনশিনহনবগী থাজবদু অমুক্কা হন্না ৱাখল চেতশিনহনবগা লোয়ননা খুনাই অসিবু থাক অমদা কাখত্হনবা ঙম্নবা হোতনরি৷ লোন য়াম্না লৈরম্বসি ঐখোয়গীদমক থম্বীরম্লবা ইরন্নি অদুগা লোন ময়াম শীজিন্নরিবা অসিনা ঐখোয়গী হিংলিবা পুন্সি মহিংদুনি৷ ভারতকী লোনশিংবু থাক ৱাংহনবা হায়বসি ঐখোয়গী চাওখত-খোংথাংগী য়াম্না মরু ওইবা শরুক অমনি হায়না লৈবাক অসিনা লৌফম থোকই৷ মসিনা মীয়াম প্রজাবু গনতান্ত্রিক ওইনা শরুক য়াবগী চাং হেনগতহল্লি অমসুং মতিক মগুন লৈবা লৈবাক অমা ওইনবগী পাম্বৈ অমা ওইহল্লি৷ লোন নৈনবগী মরু ওইবদু ঐখোয়গী চতনরোলনা মতম চূপ্পদা খঙদুনা লাক্লি৷ বেদগী মতমদা ফাওবা ৱাখল-লৌশিং গা মরী লৈনবা হীরম ৬ কী মনুংদা ৪ দি লোনগা মরী লৈনরম্মী৷ মখোয়দুদি, শিক্ষা (ৱাহৈসি অহানবদা ‘খোন্থোক্লোন’বু খঙনরম্মি অদুবু হৌজিক্তি মহৈ হায়না ময়াম্না খঙনরে), ব্যাকরণ – ‘লোঞ্জল’, নিরুক্তা – ‘ৱাহৈগী হৌরকফম’ অমসুং ছন্দ – ‘ছন্দশাস্ত্র’ (শৈরেং-কাঙলোন)অসিনি৷ ভারতকী লোঞ্জল্লোয়শিংনা (সংস্কৃত অমসুং তামিল লোন অনীমক্তা) তৌরম্বা থবকশিংদু তশেংনা অৱাংবা থাক্কীনি অমসুং লোনবু বৈগ্যানিক ওইনা নৈননবা য়ূম্ফম অমা শেমগতপগা লোয়ননা অনৌবা থিওরি কয়া ঐখোয়গী অহন-মীরোলগী থবকশিংদগী কান্নবা কয়া ফংলি৷ ভারততগী ৱাখল-লৌশিংগা মরী লৈনবা লাইরিকশিংসী এসিয়াগী মফম কয়াদা হন্দোক্তুনা পাবা ফংবা মতম অমা লৈরম্মী ৷ পাম্বৈ অসিমক্কী খূত্থাংদা ঐখোয়না ১৮ অমসুং ১৯ শুবা চহীচাদা নোংচূপ্লোমগী ৱাখল্লোনশিং ভারততা পুরকখিবনি৷ অদুগা অরোইবা চহীচাদদি থবক অসি তশেংনা অৱাংবা থাক্তা কারকপা উবা ফংই৷ অদুম ওইনমক, থৌওংশিংসি অয়াম্বনা মমাঙদা ওইখিবা মতৌগুম লাইরিক অমসুং ৱাখল-লৌশিংগী ঈচেলনা চুম্না অমসুং মায়কৈ অমত্তগী ওইবা মওংদা নোংচূপ্লোমদগী ঐখোয়গী লৈবাক্তা চঙশিল্লকখিবনি৷ ঙসিফাওবদসু, থৌদোক কায়াদা, হীরম কয়াদা ঐখোয়না ইংলিশতা য়ূম্ফম ওইবা লাইরিকশিং তাকপী-তম্বিরি ৷ চং য়ৌনা চাওখতলবা শহরদগী লাপথোরকপা মফমশিংদা, লম-লমদুগী লোল শীজিন্নদুনা লাইরিক-লাইশু তম্বীবগী তঙাইফদবা মতাং লৈবসু থেংনৈ, অদুবু তাক্কদৌরিবা মচাকশিংদু লোনশিং অদুদা ফংবগী অৱাবদি অদুম্মক লৈ ৷ ললোন-ইতিক অমসুং পাউ ফাওননবগী লোন অমা ওইনা ইংলিশসি হৌজিক হেন্না পাক-শন্দোরকপা য়াই অদুবু মহৈকোলশিংদা লাইরিক-লাইশু তাকপদা শীজিন্নবা লোন অমা ওইহনবদদি শাথিনা অহোবা অৱাত্পা কয়া অমা লৈ৷ অসুম্না, মহৈশঙ অমসুং মহৈশঙলেনশিংদা করম্বা লোন শীজিন্নগদগে হায়বসি তশেংনা অরুবা অমা ওইরক্লি ৷ তম্লিবা লাইরিক অদুগী লোন অমসুং তাকপদা শীজিন্নরিবা লোন অনীদুগী মরক্তা অচৌবা অহোবা অমা লাক্লি ৷

থবক থৌগতপা অমসুং চাওখতনবা হোতনগদবদি টেক্নোলোজি চাওখতহনবগী মতাংসিনি হায়না য়াম্নমক মরু ওইনা লৌবা য়াই ৷ ঐখোয়গী লোনশিং অমসুং লোঞ্জলগী মশক-মগুন তাকপসিনা নেচরেল লেংগোইস প্রোসেসিংগী থবক্তা কোর্পস অমসুং মেকানিজম শেমগত্তুনা মতেং পাংবা য়াগনি ৷ ঐখোয়না ইনফোর্মেসন টেক্নোলোজিগী তাইবংদা খোঙলৈ থুনা চতলি অমসু টেক্নোলোজি অসিগী কান্নবশিং অসি মেচিনগা মতেংনা লোন-হন্দোকপগা হীরমদা শীজিন্নগনি৷ মরী লৈনবা এজেন্টসি খুদিংমক্না ভারতকী লোন খুদিংমকপু টেক্নোলোজিগী পাম্বৈনা শমজিন্নহন্নবা মখোয়গী অঙম্বা থাক্তা হোতনগনি হায়বগী থাজবা থম্লি৷ থৌরাং অসিনা মীওই কাঙলূপশিংগী ফীবম শোয়দনা ফগত্হনবদা মতেং পাংগনি অমসুং লোন হন্দোকপগী থবকতসু খোঙজেন য়াঙহল্লগনি৷

লোন হায়বসি তাইবং মীওইবদা পীবিরবা মমল য়াম্লবা খুদোলপোত অমা ওইবতা নত্তনা মফম অমসুং মতমগী মরক্তা লৈরিবা অহাঙবদু শমজিন্নবগীদমক থোং শানবা পাম্বৈসু ওইরিবনি৷ লোনগী মতাংদা লৈরিবা চয়েতনবা ৱাফম কয়া ওইহল্লক্লিবা শাফুশিং অদুগী মরমদা ঐখোয়না খনফম থোকই ৷ তোঙান-তোঙানবা লোন ময়াম লৈবসি ঐখোয়গীদি ইরন্নি অমসুং লোনয়াম শীজিন্নবগী চতনবী লৈবসিনা ঐখোয়গী লেমজনীংঙাই ওইবা মশক্তুনি হায়বসি মীয়ামদা ভাব তাহনবা চঙই ৷ মী অমগী মরাইবক্কা লোনগী মরাইবক্কা অমসুং মদুদগী ঐখোয়না ফংলিবা ৱাখল-লৌশিং কয়াসিগা ততন-থানবা য়াদ্রবা মরী লৈনৈ হায়বসি ঐখোয়না তশেং-তশেংনা খঙলবনি৷ ৱাখল-লৌশিংবু লোন অমদগী অতোপ্পা লোন অমদা পীথোক-পীশিন তৌবা ঙমহন্নবগীদমক ঐখোয়না চতনবী অমা শেম্বগত্পগী মথৌ তাই ৷ মতাং অসিদা য়েংবা তারগদি, জাতিগী লোন হন্দোকপা মিশন সি ৱাখল-লৌশিংদা য়ূম্ফম ওইবা মচাকশিংদা থিজিন-হুমজিনবা অমসুং লাইরিক-লাইশুগী মতাংদা ৱাখল লৌথোক-লৌশিন তৌবদা নত্তনা ভারতকী লোন চাওখত্হনবগী মরী শেম্বদা য়াম্না মরু ওইবা পাম্বৈ অমা ওইরকপা য়াগনি ৷