চত্থরক্লিবা থবক থৌরমশিং

লমজিং লমতাক্লিবা প্রোজেক্ট - অনুকৃতি

প্লানিং কমিশন্না লোন-হন্দোকপগী হীরমদা ‘অনুকৃতি’ কৌবা অচৌবা প্রোজেক্ট অমা চত্থনবগী অয়াবা মহিশুরদা লৈবা ভারতকী লোনশিংগী নৈন-শঙলেন (CIIL) দা পীখ্রে ৷ অনুকৃতিঃ ত্রান্সলেতিং ইন্দিয়া হায়না মিংথোনবা ৱেবশাইত অসি ভারতকী লোন খুদিংমক্তা হন্দোকপগী থবক অমসুং ঈ-পাউ ফংহনবদা শীজিন্নবা য়ানবা মওংদা শেমখ্রবা ৱেবশাইত অমনি ৷ ভারতকী লোনশিং চাওখত্হন্নবা হোতনরিবা মহিশুরদা লৈরিবা সি আই আই এল (MHRD গী মখাদা), সাহিত্য একাদেমি অমসুং নিউ দিল্লিদা লৈরিবা নেসনল বুক ট্রষ্ট অহুম অসিনা অসিগুম্লবা ৱেবশাইত অমা শেম্বগী ৱাখল্লোন অসি হৌদোক্লকখিবনি ৷

১০শুবা প্লান পেরিয়দকী মনুংদা প্রোজেক্ট অসিগীদমক অপূনবা লুপা লাখ ৫৯.৬৪ কাইথখ্রে ৷ থৌরাং গী মখাদা অনুকৃতি প্রোজেক্টনা ফংলবা মহৈশিংদি মখাগীশিং অসিনি-

  » লোন হন্দোকপদা খুদোং চাহল্লিবা ৱেবসাইত www.anukriti.net অসি শেমখ্রে৷ হায়রিবা ৱেবসাইত অসি চহীগী লেপ্তনা অনৌবা ঈ-পাউশিং হাপকত্তুনা মতমগা চূননবা হোতনৈ৷
  » ‘ত্রান্সলেসন টুদে (Translation Today)’ হায়না মিংথোনবা চহী অহুম-অহুমগী ফোঙবা হন্দোকপগী চেফোঙ অমা ওনলাইন্দা পুথোকখ্রে ৷
  » লোন হন্দোকপগা মরী লৈনবা ঈ-পাউশিংগী থম্ফম দাটাবেজ অমা অমসুং জাতিগী থাক্তা লৈবা হন্দোক্লোয়শিংগী মিং চন্ফম অমসু লৈরে৷
  » ইংলিশতগী কন্নড় লোনদা মেচিনগী মতেংনা হন্দোকপগী থৌরাংদা য়ূম্ফম ওইবা থবক খরা লৈখ্রে৷
  » হন্দোক্লগা ফোঙদোকখ্রবা লাইরিকশিংগী কেটলোগশিং, মরু ওইবা লাইরিক ফোঙফমশিংদগী খোমগতলগা ৱেবসাইততা হাপ্পি৷
  » লৈবাক অসিগী মনুং অমসুং মপান্দা ফংলিবা মখল মখা কয়াগী হন্দোকপগা মরী লৈনবা কোর্সশিংগী মরমদা অকূপ্পা মরোলশিং ৱেবসাইততা ফংহল্লি ৷
  » হন্দোকপগী থবকপু শিন্ফম অমা ওইনা পায়খতলিবা তোঙান-তোঙানবা এজেন্সিশিংগা মরী থম্মী ৷
  » ওনলাইন হন্দোক্লোয়শিংগী মতেং ওইনবগীদমক মখল মখা কয়াগী হন্দোক্লবা শোফৱের ওন-লাইনগী খূত্থাংদা লৈবা য়াহল্লি ৷
  » হন্দোকপা তম্বগা মরী লৈননা ৱাহৈ-ৱাতাশিংগী লোনগৈ অমা অমসুং লাইরিকশিংগী বিব্লিওগ্রাফি অমা শেম্বা লোইশিল্লক্কদৌরে৷

এন সি আর তিনা পাঙথোকখ্রবা থবকশিং
এন সি ই আর তিনা হিন্দি অমসুং উর্দু লোন্দা তমগদবা ক্লাশ ট্রেল্ব ফাওবগী তম্নলাইরিকশিং হন্দোকপা লোইখ্রে৷ মসিনা ৮ শুবা সেদ্যুলদা চল্লবা লোন ২২ মক্তা নেসনল কারিকুলম ফ্রেমৱার্ক (NCF) অহানবা ওইনা হন্দোকপনি ৷ এন তি এমনা, ভারতকী সেদ্যুলদা চল্লবা লোন খুদিংমক্তা হায়রিবশিং অসি হন্দোকপদা মতেং পাংবা ঙমগনি ৷

ভারততা হন্দোকপগী ফোঙদোক্লবশিং
সাহিত্য একাদেমি অমসুং নেসনল বুক ট্রষ্ট অনীসি মথং মনাউ নাইনা ইং ১৯৫৪ অমসুং ইং ১৯৫৭ দা লিংখতখি ৷ মখোয়না মখোয়গী পান্দমগী শরুক অমা ওইনা হন্দোক্লবা মচাকশিংবু ফোঙদোকপগী থবক পায়খত্তুনা ভারততা লৈরিবা তোঙান-তোঙানবা লোনশিং, লমশিং অমসুং কাঙলুপশিংগী মরক্তা মরী লৈনহল্লিবা অহানবা পব্লিক সেক্তর ওইখি ৷

ইংলিশ অমসুং ভারতকী লম-লমগী লোনশিংদগী অতোপ্পা ভারতকী লোনশিংদা নত্ত্রগা ভারতকী লোনশিংদগী ইংলিশ লোন্দা হন্দোক্লবা সাহিত্যগী মচাকশিংবু সাহিত্য একাদেমিনা হৌরকপদগী ঙসি ফাওবদা ফোঙলক্লি ৷ হৌজিক ফাওবদা লোন ২৪ দা লাইরিক ৭,০০০ লোম পুথোকখ্রে ৷ হৌরকপদদি হন্দোকপগী থবকসি একাদেমি অসিনা শকখঙবা লোনখক্তদগী ওইরম্মি ৷ অদুবু হান্না বারোদাদা অদুগা হৌজিক্না শিলোংদা লৈরবা ত্রাইবল সাহিত্যগী প্রোজেক্ট অমগী খূত্থাংদগী ত্রাইবলগী লোন/লোনথৈ খুদম ওইনা গরৱালি, ভিলি, কুকি, গারো, গাম্মীত, মিজো, লেপচা, পাহারি, মন্দারি, গোন্দি অসিনচিংবা কয়া অমদগী হন্দোকপগী থবকশিং পুথোকপা হৌখ্রে ৷ মরু ওইনা, মসিনা লোন মান্নদবশিংগী মরক্তা হন্দোকপগী হীরমদা মতেং পাংই ৷

নেসনেল বুক ট্রষ্টকী ‘অদান-প্রদান’ কৌবা সেরিজ অমা লৈ, মদুদা ৮ শুবা সেদ্যুলদা চল্লবা লোনশিংদগী মতম-মতমগী ওইবা ক্লাসিক ৱারীশিং খনগত্তুনা ইংলিশ অমসুং অতোপ্পা ভারতকী লোনশিংদা হন্দোকই ৷ এন বি টিগী থৌদাংসি সাহিত্যখক্তদা ওইদে ৷ মীয়ামগী হক, হকশেল, অকোয়বগী ফীবম, কলা, অর্কিটেকচর, পোলিটিকেল সাইন্স, পুৱারীনচিংবশিংগী মরমদা ৱাখল-লৌশিংগী ওইবা লাইরিকশিংসু ফোঙই ৷ মসিগীসু মথক্তা অফাওবা মীওইশিংগী তোঙান-তোঙানবা পুন্সি-খোঙচত ৱারীশিংসু ফোঙই ৷

লাইরিক-লাইশু তম্বীবগী মতাংদা ভারততা ফোঙলিবা লাইরিকশিংগী চাদা ৮০দি ইংলিশ লোন্দা ওইরবসু ’৮০গী মতুংদা ভারতকী শেন-থুমগী ফীভম ফগতলকপা অসিনা ভারততা লাইরিক ফোঙবগী থবক হৌখ্রবা মপান লমশিংগী পব্লিসিং হাউজশিংগী পূক্নীং চিংশিনহল্লি ৷ লাইরিক ফোঙবগী ইন্দাস্ত্রি অসি নোংমা-নোংমগী চাওখতলক্লি, ইদিতোরিয়েলগী থাকসু ৱাংখতলক্লি অমসুং লাইরিক লৈবা-য়োনবগী মতাংদসু হেন্না মীতয়েং থম্লক্লি ৷ পিয়ার্সন ইজুকেশন, রেন্দম হাউজ, শেজ, মেগগ্রোউ হীল অসিনচিংবা লাইরিক ফোঙলিবশিংনা লাইরিক-লাইশুগী মায়কৈদা চাউনা মীতয়েং থম্লি ৷ ওরিয়েন্ট লোঙমেন (দিশা সিরিস), মেগমিলন (অনৌবা মতমগী উপন্যাসশিংগী ইংলিশ লোন্দা হন্দোক্লিবা পরিংশিং), পেঙ্গুইন ইন্দিয়া, ওক্সফোর্দ য়ুনিভর্সিতি প্রেস, রুপা এন্দ কো, হার্পর-কোল্লিন্স অসিনচিংবা পব্লিশিং হাউজশিংনা লোন-হন্দোকপদা য়াম্না মরু ওইবা মীতয়েং থম্বা হৌখ্রে ৷ অতোপ্পা থৌওং অমনা, মরু ওইনা ‘কথা’গুম্বা হন্দোকপদা হেন্না থৱায় য়াওরিবা পব্লিসিং হাউজ কয়া অমা থোক্লকপা অসিনি ৷ অপীকপা পব্লিসিং হাউজশিং খুদম ওইনা স্ত্রি, জুবান, রোলি অমসুং ৱিমিন অনলিমিতেদনচিংবশিংসু লোন-হন্দোকপরোমদা পূক্নীং চঙশিল্লক্লি ৷

সাহিত্যগী মচাকশিং ইংলিশ লোন্দা হন্দোকপগী ফীভম খরদা ফবা মাল্লগসু, ঐখোয়না মতাং খরগী খন্নরকপা মতমদা পূক্নীং পেন্নীংঙাই ওইদে ৷ মতাংশিং অদুদি- ১) অতোপ্পা হীরমশিংদা লৈরিবা লাইরিকশিং ইংলিশতা হন্দোকপগী মতাংদা, ২) ইংলিশ অমসুং ভারতকী লোনশিংদগী ভারতকী তোঙান-তোঙানবা লোনশিংদা হন্দোকপদা, ৩) ভারতকী লোন মশেলশিংগী মরক্তা হন্দোকপগী থবক অসিসু চাং মান্নদে, খুদম ওইনা বেঙ্গলি লোন্দগী লাইরিক ২৬০ মলায়ালম লোন্দা হন্দোকপা মতমদা মলায়ালমদগী শূপ্নদগী লাইরিক ২১ খক্তমক বেঙ্গলিদা ফংই ৷ চাং মান্নদবা অসিগী মরম অমদি লোন লোনশিংদা মহৌশানা পীথোক-পীশিনগী মতাংদা খেন্নবা লৈবসিগী মথক্তা, লোনশিং অদুদা হন্দোক্লোয় লৈতবা অসিনি ৷ লোন অয়াম্বদা ইংলিশ লোন্দগী ভারতকী লোন অমদা নত্ত্রগা হিন্দীদা হন্দোক্নবা অখঙ-অহৈ কয়া অমা লৈরি অদুবু, ভারতকী লোন মশেলগী মরক্তা খুদম ওইনা তামিল-মলায়ালম, মলায়ালম-গুজারাতি অদুগা লোন অতৈ অতৈশিংগী মরক্তসু লোন হন্দোকপীনবা মী তশেংনা লৈতে ৷

তম্ন-হীরমশিং
অকক্নবা তাইবং মহৈকোল খরদা হন্দোকপগী তম্ন-হীরমশিং হাংলি ৷ হৌজিক হৌজিকমক, মখাগী তম্ন-হীরমশিং অসি ফংহল্লি -
1. অন্নমলাই তাইবং মহৈকোল-  
  ১) হন্দোকপগী মহৈদা পোস গ্রেজুয়েত দিপ্লোমা
  ২) এপ্লাইদ লিঙ্গুইষ্টিক্স অমসুং লোন হন্দোকপগী মহৈদা এম এ তম্বা
  ৩) হন্দোকপগী মহৈদা এম এ তম্বা
  ৪) লোন্মীতলোনদা পিঐচদি
  ৫) হন্দোকপগী মহৈদা এম ফিল তম্বা
2. অগ্রা তাইবং মহৈকোল, কে এম ইনষ্টিট্যুদ হন্দোকপগী মহৈদা দিপ্লোমা কোর্স
3. হিমাচল প্রদেশ তাইবং মহৈকোল হন্দোকপগী মহৈদা এম ফিল তম্বা
4. পণ্ডিত রবিশঙ্কর শুক্লা তাইবং মহৈকোল হন্দোকপগী মহৈদা সার্টিফিকেত কোর্স
5. স্বামি রমানন্দ তির্থ মরাথ্বাদা তাইবং মহৈকোল হন্দোকপগী মহৈদা সার্টিফিকেত কোর্স
6. পুনে তাইবং মহৈকোল হন্দোকপগী মহৈদা সার্টিফিকেত অমসুং দিপ্লোমা কোর্স-শিং
7. হায়দ্রবাদ তাইবং মহৈকোল ( সেন্তর ফোর দিষ্টেন্স এজুকেসন) হন্দোকপগী মহৈদা পি জি দিপ্লোমা তম্বা (PGDTS)
8. হায়দ্রবাদ তাইবং মহৈকোল (হিন্দী মশঙ)
  ১) হন্দোকপগী মহৈদা দিপ্লোমা তম্বা
  ২) শিন্ফম ওইনা লোন হন্দোকপগী মহৈদা এদভান্স দিপ্লোমা তম্বা
  ৩) হন্দোকপগী মহৈদা পোসগ্রেজুয়েত দিপ্লোমা
9. হায়দ্রবাদ তাইবং মহৈকোল (CALTS) হন্দোকপগী মহৈদা এম ফিল অমসুং পিঐচদি
10. সি আই ই এফ এল (হৌজিক্কী তি ই এফ এল য়ু) হাইদ্রবাদ, দ সেন্তর ফোর ত্রান্সলেসন ষ্টাদিস (CTS) হন্দোকপগী মহৈদা পোস-গ্রেজুয়েত দিপ্লোমা
11. কেরল তাইবং মহৈকোল হন্দোকপগী মহৈদা পোষ্ট গ্রেজুয়ত দিগ্রী
12. মদুরাই কামারাজ তাইবং মহৈকোল হন্দোকপগী মহৈদা পি জি কোর্সশিং
13. তামিল তাইবং মহৈকোল, থানজাবর হন্দোকপগী মহৈদা দিপ্লোমা কোর্স
14. বিশ্ব-ভারতি ফঙ্কসনেল হিন্দীদা এম এ তম্বা (হন্দোকপা)

পনজখ্রিবশিং অসিগী মথক্তা তোঙান-তোঙানবা য়ুনিভর্সিতিশিংদা হাংলিবা সাহিত্য চাংদম মশঙ কয়া অমদা লোন-হন্দোকপগী হীরমসু তম্ফম লৈরি (খুদম ওইনা - জাদবপুর তাইবং মহৈকোল, কোলকাতা অমসুং ভির নর্মাদ, সাউথ গুজরাত তাইবং মহৈকোল, সুরত)৷ হন্দোকপগী মতাংদা তম্ন-হীরম কয়া হাংলিবা লন্নাইগী শিন্দমশঙশিং কয়া অমসু লৈরি৷ খুদম ওইনা, হন্দোকপগী মহৈদা দিপ্লোমা, ইনস্টিটিয়ুট ওফ ত্রান্সলেশন্স ষ্টাদি, বেঙ্গলোরদা লৈবা (রেজিষ্টর তৌরবা)৷ অসিগুম্লবা তম্ন-হীরম কয়া হৌজিক্তি লায়না ফংলে ৷

ভারতকী লোনশিংগী ওইবা খোমজিন-ৱারোল পূক্কৈ (LDC-IL)
ভারতকী লোনশিংগা মরী লৈননা কোর্পস-লোন্মীতলোন অমসুং লোনগী টেক্নোলোজিগী হীরমদা থিজিল্লিবা মীওইশিং অমদি কম্প্যুটারদা প্রোগ্রাম শেম-শারিবা মীওইশিংবু মতেং পীনবগীদমক এল দি সি আই এল অসি লিংখতখিবনি ৷ লোনগী টেক্নোলোজিগী হীরমদা থিজিনবা অমসুং চাওখত্হনবগী মতাংদা লোনগী দাটা হায়বসি খ্বায়দগী মরু ওইবা মচাক অমনি ৷ হিন্দী অমসুং অতোপ্পা লোনশিংদা মেচিন্না পাবা ঙম্বা লোনগী দাটা হেনগত্হনবগী তঙায়ফদবদু এল দি সি আই এলনা ফোঙদোকখি ৷ লোন্মীতলোনগী মতাংদা খোমগতলবা দাটাগী চাংবু শীন্দোক-শীঞ্জিন তৌবা অমসুং শন্দোক্না তাকপগা মরী লৈনরিবা ইশ্যুশিং অসিদগী অতোপ্পা হীরম কয়ামরোম, খূদম ওইনা হায়রবদা- লোন্মীতলোন, ষ্টেটিষ্টিক, ইঞ্জিনিয়রিং অসিনচিংবা য়াওহনবগী তঙাইফদবা লৈহল্লি৷

এল দি সি আই এলনা পাঙথোক্কদবা থবকশিংদি
  » অইবা চেরোল, খোঞ্জেল অদুগা খোমজিল্লবা ৱাহৈশিংগী ওইবা লোনগী মচাকশিংগী থম্ফম অমা ভারতকী লোন খুদিংমক্কি শেম্বা
  » তোঙান-তোঙানবা লূপশিংনা অসিগু্ম্বা দাটাবেজশিং অসি শেম্বদা খুদোং চাহনবা
  » তোঙান-তোঙানবা হীরমদা থিজিন-হুমজিনবা অমদি চাওখত্-খোঙথাংগী থবকশিংগীদমক দাটা খোম্বা অমদি খোমজিল্লবা অইবা মচাকশিংবু লীশিন্দুনা থম্বা
  » দাটা খোমজিনবা অমসুং অশিন-অরাঙগী থবক চাওখত্হনবগা লোয়ননা পাম্বৈশিং শীজিন্নবদা থৌদোংবা
  » খূত্সু-খূতলাই অমসুং মদুবু শীজিন্নবগী হীরমশিংগা মরী লৈননা ৱার্কসোপ, নৈন-মীফমশিং শীন্দুনা শিল্লম-শিন্থা পীবগী থবক্তা হেন্না খুদোং চাহনবা
  » এল দি সি আই এলগী মতেং দরকার লৈরকপদা ফংনবগীদমক মরু ওইবা লম্বী অমা ওইগদৌরিবা এল দি সি আই এলগী ৱেবসাইত শেম্বা অমসুং নীংথিনা থম্বা
  » মীয়াম্না পাক শন্না শীজিন্নবা য়ানবগীদমক লোনগী চূনবা খূত্শু-খূতলাইশিং শেম্বদা মতেং পাংবা
  » মহৈ-লোয়শঙশিং, লন্নাই থিজিল্লোয়শিং অমসুং মীয়ামশিংগী মরক্তা দরকার ওইবা মরী থম্বা
 
পঞ্জখ্রিবশিং অসি মেচিন্না হন্দোকপগী থবক্তা হেন্না খুদোং চানবা মরম ওইবনা জাতিগী থাক্তা হন্দোকপগী থবক্তসু হকথেংননা কান্নহনগনি ৷

দেক অমসুং তি দি আই এলনা পাঙথোকখ্রবা থবকশিং
মেচিন্না লোন-হন্দোকপা (এম তি) ঙম্বগী মতাংদা চিংনরম্বা মীওইশিংনা, মসিগী মখল কয়া অমা মালেমগী মফম কয়াদা লৈরে অমসুং শীজিন্নরে হায়বসি খঙলগদি শোয়দনা ঙক্কনি ৷ খুদম ওইনা, য়াম্না মমিং লৈরবা সিস্ত্রেইন (আলতা ভিস্টানা ইঞ্জিন থিননবা শিজিন্নবা) অমসুং মেতিও (কনাদাগী মেতিওরোজিকেল সেন্তরদা নোং-চীঙগী ফিভমবু খুদক্তা খঙহনবগী থবক্তা ৱাহৈ ৪৫,০০০ হেন্না হন্দোক্তুনা ইং শোক ১৯৭৭ দগী শীজিন্নরক্লি)গী মিং পনবা য়াই ৷ ভারততা এম তিগী য়াওল হৌদোকখিবসি সি-দেকনা এন এল পি (নেচরেল লেঙ্গুজ প্রোসেশিং)গী মতাংদা থবক হৌরকপা মতমদা অমসুং হিন্দী, সংস্কৃত, গুজরাতি, ইংলিশ অদুগা জর্মন লোনশিংবু তোঙান-তোঙান্না খায়দোক্নবা কম্প্যুটরগী প্রোগ্রাম অমা শেম্বা মতাং অদুদগীনি ৷ টেক্নোলোজি অসিনা চাওখতলকপা মতমদা, কম্পেনি অসিনা হায়রিবসিবু পানশিন্দুনা তৌবা য়াবা থবক খয়া য়েংখি অমসুং এজেন্সি কয়াদা মসিগী মতাংদা ৱা হৌদোকখি ৷ এম তি(মেচিন ত্রান্সলেসন)গী মতীক-মঙম কয়া অমবু খঙলক্তুনা ভারত সরকারগী মখাদা লৈরিবা দিপার্তমন্ট ওফ ওফিসিয়ল লেঙ্গোএজ, (দি ও এল) হায়বদি লোয়শঙগী ওইবা লোনগী মশঙনা অসিগুম্বা প্রোজেক্টশিংদা শেল থাদবা হৌখ্রে ৷ পাউ ফাওনবা অমসুং ঈ-পাও পীননবগী টেক্নোলোজিগী মিনিস্ত্রি (MC&IT)না অকক্নবা হীরমশিংগী হন্দোকপদা চাওখত্হন্নবগীদমক মখাগীশিং অসি শকখঙখ্রে ৷

  » সরকারগী লৈঙাক্কী ওইবা প্রোসিদ্যুর অমসুং ফোর্মেতশিং
  » পার্লিয়ামেন্তকী ওইবা ৱাহং-পাউখুমশিং অমসুং হীদাক-লাংথক্কী ঈ-পাউশিং
  » আইনগী অমসুং ৱায়েন-য়াথংগী ওইবা ৱাহৈ-ৱাতাশিং

ইং-শোক ১৯৯০-৯১দা অঙম লোয়শঙ অসিনা ‘ভারতকী লোনশিংবু চাওখত্হন্নবা টেক্নোলোজি (TDIL)’ হায়বা প্রোজেক্ট অসিবুসু হৌদোকখ্রে ৷ মসিনা ভারতকী লোনশিংগী মরক্তা ঈ-পাউ ফাওনহন্নবা থবকশিং শীল্লিবা রিসর্স এন দিভলপমেন্ট (R&D)কী থৌরাংশিংদা, এম তি য়াওনা অতোপ্পা কয়া অমদা শেন্থং পীদুনা শৌগতকনি ৷ অদুম ওইনমক, লোয়শঙগী ওইবা লোন ২২দা হন্দোকপা হায়বসি অরাইবা অমদি ওইদে ৷ ইংলিশ অমসুং হিন্দীগী লোন জুরা অসিদা, হন্দোকপগী য়াম্নমক তঙাইফদবা লৈবনা অমসুং সরকারগী লোয়শঙশিংদা ঈ-পাউ ফাওনগদবা কয়া অমা লৈবনা, হায়রিবা লোন জুরা অসিদা মেচিন্না হন্দোক্নবগী মীতয়েঙ থম্লি ৷

মসিগী মতুং ইন্না, থিজিন-হুমজিন্নবা অখন্নবা হীরম অনী খঙদোকখ্রে- ভারতকী লোনশিংগী মরক্তা মেচিনগী মতেংনা হন্দোকপা, অমসুং ইংলিশ লোনগা ভারতকী লোনশিংগগী মরক্তা মেচিনগী মতেংনা হন্দোকপা অসিনি ৷ হৌজিক-হৌজিক লৈবাক্সিগী শিন্দমশঙ অহুমদা, মমিং ওইনা পল্লবদা সি-দেক পুনে, (এন সি এস তি নত্ত্রগা সি-দেক মুম্বাই হায়রগা হৌজিক খঙনরিবা) আই আই আই টি - হাইদ্রবাদ, আই আই টি - কানপুর মখোয়শিং অসিনা মতমগা চূনরবা টেক্নোলোজি অসি শীজিন্নদুনা লোন-হন্দোকপগী মতাংদা চাওখত্হন্নবা থবকশিংদা লমজিংলি ৷

দিপার্টমন্ট ওফ ইলেকত্রোনিক্স (দি ওফ ই) গী ৱাখল-লৌশিংদা য়ূম্ফম ওইবা কম্প্যুটার সিস্তেমগী প্রোজেক্ট অদুগী মখাদা ইংলিশ, হিন্দী, গুজরাতি অমসুং সংস্কৃত লোনশিংগী ৱাহৈ পরেংশিংদা য়াওরিবা মচাকশিংবু শক্তাক্নবা সি-দেকনা ব্যাকর্তা পুথোকখি ৷ মসিনা মন্ত্র (ইংলিসতগী হিন্দী লোন্দা, লোয়শঙলোনগী ওইবা ৱাহৈ পরেংশিং মেচিনগী মতেংনা হন্দোক্নবগী পাম্বৈ অমা) পুথোকপদসু চপ মান্নবা মওং শিজিন্নখি ৷ হায়রিবসিমক, লৈঙাক্লোনগা মরী লৈননা শেমখিবা ‘ইংলিশতগী হিন্দী লোন্দা হন্দোকপা’ হায়না মিংথোনবা প্রোজেক্ট অমদা শেন্থং পীথরিবা দিপার্টমেন্ট ওফ ওফিসিয়েল লেঙ্গোইজ (লোয়শঙগী ওইবা লোনশিংগী মশঙ)দা ঊতখ্রে ৷ প্রোজেক্ট অসিগী পান্দমদি কম্প্যুটারগী মতেংনা হন্দোকপগী সিস্তেম অমা পার্সনেল এদমিনিষ্ট্রেসনগীদমক শেম্বা, চাওখত্হনবা অমসুং চতনহনবনি৷ হৌজিক সিস্তেম অসিনা, খুদম ওইনা থবক ফংবা অদুগা মফম হোংবগী চিঠি অমসুং সর্কুলরশিং হন্দোকপা ঙম্লে ৷ অমুকসু মসিনা স্তেন্দর ৱার্দ প্রোসেসিং অমসুং দি তি পি পেকেজশিংদগী মচাকশিং হাপচিনবা ঙম্মী৷

ইংলিশতগী হিন্দীদা মায় পাক্না মথক্কী হীরম অসিদা হন্দোক্লবা মতুংদা সি-দেকনা অতোপ্পা হীরম অমদা মসিবু শন্দোক্নবা অমসুং লোনয়ামশিংগী মরক্তা লোন হন্দোক্নবা টেক্নিক অসি শীজিন্ননবা ঙাইরি৷ মসিগী তৌবা ঙম্বা অসিনা লোন জুরা অমদা হেক্তা মেচিন্না হন্দোকহনবা ঙমহনগনি৷

এম তিগী হীরম অসিদা শরুক য়ারিবা অতোপ্পা কাঙবু অমদি হৌজিক্না সি-দেক মুম্বাই হায়না খঙনরিবা এন সি এস টি মুম্বাইনি ৷ এন সি এস টিসি এম তিগী মতাংদা অহানবা থবক তৌবা ভারতকী শিন্দমশঙশিংগী মরক্তা অমনি ৷ ৮০গী লোইরকপা মতাংদা পি তি আইগী মখল-মখা কয়াগী অখন্নবা ঈ-পাউগী ৱারীশিং হন্দোক্নবগীদমক অহানবা প্রোতোতাইপ, স্ক্রিন তোল্ক পুথোকখ্রে ৷ মদুগী মতুংদগীদি মসিনা মাত্রা কৌবা হীরম খুদিংমক্তা শীজিন্নবা য়ারবা অতোপ্পা শোফৱ্যের অমা ইংলিশ অমসুং ভারতকী লোনশিংগী মরক্তা (হিন্দীনা হান্না হৌরদুনা) হন্দোক্নবা পুথোকখ্রে ৷ মাত্রা অসি হীরম অনীদা শীজিন্নবা য়াই ৷ ওটোমেতিক মোদতা, সিস্তেম অসিনা য়ারিবমখৈ ফজনা হন্দোকই ৷ হায়রিবসি শীজিন্নরিবশিংনা কোন্না অমুক শেমদোক-শেমজিন তৌই ৷ মেনুয়েল মোদতা, শীজিন্নরিবশিংনা ইনট্যুতিভ জি য়ু আই (GUI) শীজিন্নদুনা সিস্তেম অদুগী অচুম্বা ৱাহন্দোক ফংনবা হোতনগনি ৷

মতমগা চুনরবা টেক্নোলোজি অসি চাওখতহনবদা, আই আই টি -মুম্বাই অমসুং আই আই টি-কানপুরনা প্রোজেক্টশিং খুদম ওইনা অনুসারাকা, এঙ্গলাভারতি, অনুভারতি অসিনচিংবশিংগী খূত্থাংদা লমজিংলি ৷ হৌজিক-হৌজিক য়াম্না নৌরিবা খোঙথাং অমা ৱাফম অসিগী মতাংদা য়ুনিভর্সেল নেটৱার্কিং লেংঙ্গোইজ (য়ু এন এল) গী খূত্থাংদা আই আই টি বোম্বেদা খন্নরি ৷ মেচিন্না হন্দোকপগী মতাংদদি ‘এঙ্গলাভারতি’ অসিনা অওনবা অমা পুরক্কনি হায়না খন্নৈ ৷ মসি অখন্নবা মীয়ামগী হকশেল কেম্পেইনগী হীরমদা ইংলিশতগী হিন্দী লোন্দা মেচিনগী মতেংনা হন্দোক্নবা সিস্তেম অমনি ৷

চত্থরিবা প্রোজেক্ট খুদিংমকশিং অসি ইংলিশতগী হিন্দী লোন্দা মেচিন্না হন্দোকপদা পূক্নীং লূপ্পা ওইবনা, অতোপ্পা লোনরোমদা শন্দোক্লকপা হায়বসি অরায়বা ওইদ্রি ৷ আই আই টি কানপুরদা হৌদোকখিবা কোন্না অমুক মতুংদা আই আই আই টি হাইদ্রবাদ অমসুং সি এ এল টি এস (CALTS) হাইদ্রবাদ তাইবং মহৈকোল পূন্না শরুক য়ামিন্নদুনা চাওখত্হনখিবা অনুশারকা প্রোজেক্টসি ইনৌ-নৌবা অমা ওইখি ৷ অমসুং মসি ভারতকী লোন অমদগী অমদা হন্দোক্নবগী মপুং ফারবা পান্দমগা লোয়ননা হৌদোকখিবা অমনি ৷ অনুশারকা হায়বসি ভারতকী লোন অমদগী অমদা অইবা মচাকশিংবু ওন্থোকপা ঙম্বা শোফৱ্যের অমনি ৷ মসিনা গ্রামারদি কয়া চুম্বা ওইদ্রগসু অপাবশিংনা ভাব তাবা ঙম্বা আউটপুতশিং পী ৷ খুদম ওইনা, বেঙ্গলিদগী হিন্দী অনুশারকা অসিনা বেঙ্গলিগী অইবা মচাক খরা লৌরগা হিন্দীদা হন্দোক্তুনা পুথোকপা য়াই ৷ মদু গ্রামারদি লোয়নমক চুমদবা য়াই অদুবু অপাবশিংনদি ভাব তাগনি ৷ মতৌ অসুম্না, লোন অমগী ৱেবসাইত্তা চঙলিবা কনাগুম্বা অমনা লোন অদুবু খঙদ্রবসু, অনুশারকা শীজিন্নবদি হৈগনি অদুগা অইবা মচাকশিংদু পাবা ঙমগনি ৷ অনুশারকাসি তেলেগু, কন্নড়, বেঙ্গলি, মরাথি অমসুং পনজাবি হায়রিবা লোনশিং অসিদগী হিন্দী লোন্দা ওন্থোক্তুনা শেমখি ৷ অসুম্না শেমখিবা সিস্তেমসি মীয়ামগী শোফৱ্যের ওইনা ফংহনগনি ৷ আই আই আই টি হাইদ্রবাদনা অতোপ্পা শক্তি কৌবা অনৌবা হন্দোকপদা তেংবাং ওইবা সিস্তেম অমগা লোয়ননা মমিং লৈরক্লি ৷

হৌজিকসু থিজিন-হুমজিল্লোযশিংগা লোয়ননা তাইবং মহৈকোল/ আই আই আই টিশিংনা পায়খত্কদবা থবক মফম কয়া অমা লৈরি হায়বসি ঐখোয়না খঙলে ৷ অদুগা মতাং অসিদা পূক্নীং চঙনা হোতনরিবা শোফৱ্যের ইন্দাষ্ট্রিশিংনা এন তি এমগী ঙাক্লৌ ফংবগী মথৌ তাই ৷