হৌরকফম

জাতীগী লোন হন্দোকপা মিশন (এন.তি.এম.)গী ৱাখল্লোন অসি ভারতকী প্রধান মন্ত্রী ডা. মনমোহন সিংহদগী শাফোঙলকখিবনি৷ অরুবা হীরম কয়াদা লৌশিং-জ্ঞান তানশিনবা হেনগতহন্নবগীদমক অমসুং মহৈ-মশিং তম্বদা মীয়াম্না লৌরিবা থৌদাংবু পাকথোক-চাউথোকহনবগা লোয়ননা লেপ্তনা মহৈ-মশিং তমশিন্নবগীদমক হন্দোক্লবা মচাকশিংবু য়াম্না লায়না ফংহনবসি কয়ামুক মরুওইবগে হায়বা ৱাফমদু মহাক্না নেশনেল নোলেজ কমিসন (এন.কে.সি.)গী অহানবা মীফমদা ফোঙদোকখি৷ শ্রী শাম পিত্রোদানা সভাপতি ওইখিবা মীফম অদুনা হায়রিবা ৱাফম অদুবু লৌশিনবগা লোয়ননা ভারততা মহৈ-মশিং তম্বগী লমদা হন্দোকপগী মরুওইবা অদু হেনগতহন্নবগীদমক তোঙানবা মহৈলোয়শঙ নতত্রগা মিশন অমা খূদক্তা লিংখতনবগী তঙাইফদবা অদু ফাওখি৷

লোন হন্দোকপা হায়বসি ভারততা হান্নদগী চত্থরক্লিবা থবক পরিং অমনি হায়বসি অচুম্বনি; হায়রিবা হীরম অসিদা মীয়াম্না মায়পূননা শরূক য়াবগী তঙাইফদবা অমা লাক্লিবা অসিদি লৈবাকসিদা পায়খতলিবা হন্দোকপগী থবকশিংদা খেন্নবা অমা লৈবা- হায়বদি পায়খতলিবা দিসিপ্লিনশিংদা অমসুং লোনশিংদা খেন্নবগা লোয়ননা হন্দোক্লবা মচাকশিং অদুগী মগূনদা খেন্নবা, অপাবশিংদা য়ৌহনবা অমসুং ফংহনবগী থবক্তা খেন্নবা কয়া লৈবদগীনি৷ হন্দোকপগী থবক অসিনা লাইরিক-লাইশু হৈরবা থবক ফংদবা মীওইশিংবু মপূক্নীং থৌগতপীদুনা শেন্থোক লৈজবা শিনফম অমগা লোয়ননা মীয়ামগী মতেং পাংননবা মীয়ামদা হকথেংননা অমসুং নাকোইননা থবক ফংহনবসু ঙমগনি৷

হন্দোকপগী থবক অমসুং হূমেন রিসোর্ছশিং হেনগতহল্লগা লৌশিং–জ্ঞান লৈরবা খুনাই অমা শেমগতপগী ৱাখল্লোন অমনা নেশনেল নোলেজ কমিশন (এন.কে.সি.)বু হন্দোকপগী থবক, হন্দোক্লবা লাইরিকশিংবু প্রমোত তৌবা, ফোঙদোকপা অমসুং অপাবশিংদা পাকশন্না য়ৌহনবদা শরূক য়ারিবা তোঙান তোঙানবা এজেন্সিশিং অমসুং মীওইশিংবু পূনশিলহনবা ঙমগদবা অদুগুম্বা ৱর্কিং গ্রূপ অমা ডা. জয়টি ঘোসনা লুচিংলগা শেম্ননবগী ইথিল পীখি৷ থবক পায়খতমিন্নরিবা কাঙবূ অসিদা মরী লৈনবা গভর্নমেন্ট অমসুং সেমি–গভর্নমেন্টকী ওর্গানাইজেশনশিং মীহুতশিং‚ অখঙ–অহৈশিং‚ লোলনৈরোলশিং‚ হন্দোক্লোয়শিং‚ এজ্যূকেশনিষ্টশিং, ফোঙদোক্লোয়শিং অমসুং ভারততা হন্দোকপগী থবক্তা খূত থারিবা মরী লৈনবা মীওইশিং য়াওই৷ ইং ২০০৬ কী ফেব্রুৱারী থাদা কাঙবূ অদুনা দিল্লীদা অহানবা উনবদা থবকসিবু পায়খতনবগী চাউরাকপা পোরম অসি সেন্ট্রেল ইন্সটিট্যূত ওফ ইন্দিয়ন লেংগ্বেজেসকী মতমদুগী দিরেক্টর ওইবীরম্বা প্রো. উদয় নারায়ন সিংহনা য়াত্থোকপীরমখি৷