হন্দোক্লোয়শিংবু তাকপী-তম্বীবা অমসুং হন্দোকপগী অয়াচে পীবা

ডিতেইলড প্রোজেক্ট রিপোর্টতা পনজখিবগুম, লৈবাক অসিদা হন্দোকপবু ইণ্ডষ্ট্রি অমা ওইনা লিংখতনবগী পান্দমদা এন.তি.এম.না পায়খতলিবা থৌরাংশিংগী মনুংদা অমদি হন্দোক্লোয়শিংবু হন্দোকপগী অয়াচে পীবা অসিনি৷ মসিনা হন্দোক্লোয় অদুবু মীয়ামদা শক্তাকপদা হেন্না কান্নগনি হায়না এন.তি.এম.না থাজৈ৷

হন্দোক্লোয় ৫০০০ রোমগী মথক্তা মিং চনশিল্লবা নেশনেল রেজিষ্টর ওফ ট্রান্সলেতর্সপু এন.তি.এম.না চেকশিন্না থম্লি৷ এন.তি.এম.না লৈবাক অসিগী তোঙান তোঙানবা মফমশিংদা হন্দোক্লোয়শিংগীদমক তোঙান তোঙানবা লোনশিংগী অমসুং হীরমশিংগী অখঙ-অহৈশিং য়াওনা ওরিএন্টেশন প্রোগ্রামশিং পাঙথোক্লি অদুগা মখোয়দগী কান্নরবা মোত কয়াসু ফংলি৷

হৌজিক হৌজিকমক, হন্দোক্লোয়শিংবু তাকপী-তম্বীবা অমসুং হন্দোকপগী অয়াচে পীবদা শরূক য়ারিবা মীওইশিং/এজেন্সিশিং হায়বদি স্কূল ওফ ট্রান্সলেশন ষ্টদিজ এণ্ড ট্রেনিং, আই.জি.এন.ও.য়ু., ক্বালিটি কন্ত্রোল ওফ ইন্দিয়া (ক্যূ.সি.আই.)নচিংবগা এন.তি.এম.না ৱা তাথোক–তাশিন তৌরগা মখোয়গী পাউতাক লৌরি৷ হন্দোকপগী অয়াচে পীনবগী মরমদা তোঙান তোঙানবা মহৈতম্ফমশঙশিং অমসুং এজেন্সিশিংগী মহূত শিন্দুনা লাকপা অখঙ-অহৈশিংগী টিমশিং য়াওরগা ৱাখল-লৌশিং থোকপা সেসন খরা এন.তি.এম.না পাঙথোকখ্রে৷ হন্দোকপগী অয়াচে পীবগী নীতি–নিয়মশিং এন.তি.এম.গী ৱেবসাইততা থূনমক মীয়ামদা খঙহল্লগনি৷

হন্দোক্লোয়শিংবু তাকপী-তম্বীনবগী প্রোগ্রাম অমসু পুথোক্নবা এন.তি.এম.না থৌরাং তৌরি৷ ভারততা অমসুং মপাল্লমদা হান্নদগী চত্থরক্লিবা হন্দোক্লোয়শিংবু তাকপী-তম্বীবগী প্রোগ্রামশিং অসিগী সিল্লেবস অমসুং কোর্স কন্টেন্তশিংবু ঐখোয়না খোমজিল্লি৷ হায়রিবা তাকপী-তম্বীবগী প্রোগ্রামশিং অসিবু দিজাইন তৌননবা এন.তি.এম.না অখঙ-অহৈশিং অমসুং তোঙান তোঙানবা ওর্গানাইজেশনশিংগসু খূতশম্ননা থবক তৌমিন্নরি৷ লৈবাক শীনবা থুংনা চত্থগদবা তাকপী-তম্বীবগী প্রোগ্রাম অমা মতম খরগী মনুংদা শোয়দনমক্কী হৌদোক্লগনি৷