शब्दकोश

अनुवाद दे साधनें च उच्च कोटि दे शब्दकोशें ते विश्वकोशें दा निर्माण राश्ट्री अनुवाद मिशन दा इक मूल उद्देश ऐ। दो-भाशी ते ई-शब्दकोशें दा निर्माण 22एं भारती भाशाएं च कीता जा करदा ऐ। एह् इस नजरियें कन्नै बी खास ऐ की जे एह्‍दे च मुहावरे, आम संर्दभ-वाक्य संरचना, उदाहरणें दी भरमार ते शब्दें दी व्याकरणिक बरतून आम कीती गेदी ऐ।

राश्ट्री अनुवाद मिशन बक्ख-बक्ख भारती भाशाएं च शब्दकोश बनाने पासै कम्म करै करदा ऐ। जि’नें द’ऊं चाल्लीं दे शब्दकोशें पर इस बेल्लै कम्म होऐ करदा ऐ ओह् न:
   क)  दो-भाशी मूल शब्दकोश
   ख)  दो-भाशी ई-शब्दकोश

दो-भाशी मूल शब्दकोश

भारती भाशा संस्थान, मैसूर ते यूनाईटेड किंगडम स्थित लांग्मैन पीयरसन समूह् ने मिलियै मई-जून 2006 च शब्दकोश बनाने दी प्रक्रिया शुरू कीती। राश्ट्री अनुवाद मिशन दी शुरुआत होने मगरा इ’नें शब्दकोशें दी बरतून अनुवाद दे साधनें दे रूप च होनी ही ते तां इस परियोजना गी 2008 च एन.टी.एम. च शामल करी लैता गेआ। इ’नें दो-भाशी शब्दकोशें दा निर्माण ब्रिटिश नेशनल कार्पस पर अधारत उ’नें प्रचलत मूल अग्रेंज़ी-अग्रेंज़ी शब्दकोशें थमां प्रेरत ऐ जेह्दे च मते शा मते बरते जाने आह्ले तकरीबन 14,000 शब्द ते वाक्यांश न।

लांग्मैन–एन.टी.एम.-सी.आई.आई.एल. मूल दो-भाशी शब्दकोशें गी गेड़-बद्ध तरीकें कन्नै प्रकाशत करने दी योजना ऐ। छे शब्दकोश जि’यां, बांग्ला, हिंदी, कन्नड़, मलयालम, ओडिया, ते तमिल पैह्ले गै प्रकाशत होई चुके दे न (सूची ख’ल्ल दित्ती गेदी ऐ), पंजाबी, गुजराती, तेलगु ते उर्दू दे शब्दकोश तौले गै प्रकाशत करोआने दी योजना ऐ।
 
पीयरसन एजूकेशन(भारत) आसेआ 2011-2012 च प्रकाशत शब्दकोशें दी सूची

  1. लांग्मैन सी.आई.आई.एल. अंगरेजी-अंगरेजी-हिंदी शब्दकोश
  2. लांग्मैन सी.आई.आई.एल. अंगरेजी-अंगरेजी-बांग्ला शब्दकोश
  3. लांग्मैन सी.आई.आई.एल. अंगरेजी-अंगरेजी-कन्नड़ शब्दकोश
  4. लांग्मैन एन.टी.एम.-सी.आई.आई.एल. अंगरेजी-अंगरेजी-ओड़िया शब्दकोश
  5. लांग्मैन एन.टी.एम.-सी.आई.आई.एल. अंगरेजी-अंगरेजी-मलयालम शब्दकोश
  6. लांग्मैन एन.टी.एम.-सी.आई.आई.एल. अंगरेजी-अंगरेजी-तमिल शब्दकोश

राश्ट्री अनुवाद मिशन शब्दकोश बनाने आह्‌ली गतिविधियें गी अगड़े बधांदे होई इ’नें शब्दकोशें गी भारती संविधान दी अठमीं अनुसूची च वर्णत 22एं भारती भाशाएं च प्रकाशत करोआने लेई कम्म करा करदा ऐ।

दो-भाशा ई-शब्दकोश:

एन.टी.एम.-सी.आई.आई.एल. दा डारलिंग किण्डर्सले (इण्डिया) प्राइवेट लि. कन्नै सलाहकारी सेवाएं आस्तै ते पीयरसन एजूकेशन दे लांग्मैन एडवांस बाईलिगंवल फ्रेमवर्क दे XML डेटासैट दी बरतून आस्तै इक करार होए दा ऐ। लांग्मैन यूके ने एन.टी.एम. आस्तै अपने आई.डी.एम. सर्वर पर A शा लेइयै Z तगर अक्खरें गितै एल.ए.बी.एफ. डेटासेट अपलोड कीते दा ऐ। एल.ए.बी.एफ. डेटासेट दी बरतून शब्दकोश उत्पादन प्रणाली (डी.पी.एस.) राहें कीती जा‍ह्‌ग जिसी मूल रूपै च लांग्मैन आसेआ बनाया गेआ ऐ ते आई.डी.एम. फ्रांस पासेआ बेचेआ गेआ हा। एन.टी.एम. दो-भाशाई-शब्दकोश अधारत न-

  » लांग्मैन समकाली अंगरेजी शब्दकोश
  » लांग्मैन एडवांस अमेरिकी शब्दकोश
  » लांग्मैन अंगरेजी ते सांस्कृति शब्दकोश
  » लांग्मैन बपारक शब्दकोश लांग्मैन अंगरेजी भाशा शब्दकोश
  » लांग्मैन कार्पस नेटवर्क अधारत सूचना

एन.टी.एम. ने बक्ख-बक्ख म्हत्तवपूर्ण पैह्‍‍लुएं पर खीरी रूप देने आस्तै पीयरसन एजूकेशन कन्नै राबता बनाये रक्खे दा ऐ।